Bid'i Kunuku

E idea

Un wega estilo "roleplay": bo ta krea un karakter ku ta bin biba na Boneiru, i e mester hasi praktikamente tur loke nos mes mester hasi — kome, traha, divertí, konosé hende, traha riba kas, traha un kunuku. E meta ta haña bo mes kunuku, montá esei, i hasi e ku ta produsí su mes. I manera den e bida real: tur kos ta traha kontra esei.

Pa haña un kunuku bo mester natural pidi aplikashon serka gobièrnu promé. Kisas e ta bai bon; kisas bo aplikashon ta pèrdè. Ora bo a haña un kunuku, bo por kuminsá konstruí.

E idea ta ku bo no tin ku sinta henter dia tras di pantaya. Kasi tur akshon ta drai outomátikamente — bo ta duna prinsipalmente direkshon.

Bo ta bringa kontra bo mes karakter

Bo karakter tin su mes personalidat, i esei no ta bo personalidat. Bo por bisa: "awe traha, despues duna planta awa." Ma despues di trabou un amigu ta pasa proponiendo bai bar. Karakter ta bisa sí, planta no ta haña awa, i bo kosecha ta resultá malu.

Riba kaminda kosnan tambe ta sosodé ku bo tin ku pensa riba nan. Un wela ta puntra bo si bo ta yuda e kruse kaminda. Bo ta yuda, òf bo ta sigui pa trabou? E desishon chikí akí ta ahustá e personalidat di bo karakter, i esei ta kambia e desishonnan ku ta wòrdu tumá próksimo biaha.

Redu i informashon

Tin un sistema kaminda informashon ta plama su mes outomátikamente. Loke bo a mira, bo por bolbe konta na otro — dependiendo di bo personalidat. Bo a mira un hende hòrta algu i bo karakter ta gusta papia? Anto e próksimo hende ku bo topa ta sa esei tambe. Asina informashon ta pasa di boka pa boka.

Bestianan

Kabritunan, buriku — bo por kapturá nan, bende nan, hasi loke bo ke ku nan.

Crafting i resèpt

Si bo ke gana plaka, bo por bai traha simpel, pero bo tambe por kuminsá traha algu. Por ehèmpel karbon:

1. Buska un mondi ku tin palu.
2. Kòrta e, bewerk e.
3. Traha un fornu. Bo no sa kon? Buska un kompader ku sa.
4. Pone palu aden, sende e, warda — esei ta tuma tempu, i tin huma ku ta sali. Hende por pasa keha, òf pensa: "no tin nada, e ta traha karbon so."
5. Listo: bende e na e merkado òf un tienda.

E mes idea ta sirbi pa otro kosnan — Piska Salu, Yórki (karni di kabritu salu i seku), i asina mas. Dor di pone e resèptnan akí, bo ta siña paso pa paso kua ta e pasonan pa traha algu den tradishon Boneiriano.

Minigame

Algu manera Mario Party den e konsepto — wega chikí — pero konektá ku e kultura di Boneiru. Un ehèmpel ta Chi ku Cha: e dos hèrmèntnan pa traha un trankera di kadushi. Hende ta yama "Chi!" òf "Cha!", i bo ta klek riba e hèrmènt korekto — i no riba e kadushi. Asina via e minigame hende ta siña kua dos hèrmènt bo ta usa i pa kiko.

Sosial

Bo por papia ku hende ku ta serka bo riba e map di e wega. Tuma un sita: "djabièrnè den e wega na Boka di Onima" — i ei bo por topa ku bo amigunan. Pa hende ku kisas no ta topa otro fásilmente den stat, ma den e wega sí — pa kumpra karbon for di otro, òf simpelmente pa papia — esei por trese un poko di konekshon.

Loke mi tin mester

Hopi kos ta kaba den e lógika. Loke mi ta lucha kuné awor:

• Art — kon tur kos lo wak? Kon mi ta kapturá e vibe di Boneiru? Kon mi ta hasi e edukativo?
• Programadó — mi semper ta buska nan, i nunka mi ta haña. Pa esei mi a hasi e engine di e wega di un manera ku e ta fásil pa amplia via Lua i bo mes SVG-gráfika. Bo por traha bo mes minigame i carga nan den e wega. Kisas esei tambe ta un manera bon pa yuda hende siña programa.